шеся, такожде егда начаша пети херувимскую песнь, и егда вьзглашаху «Святаа святиимь», пакы тим же образомь глас слышашеся. Мати же его страхомь и трепетомь обьята бывши и в себе помышляше, что будеть се. Дивлю же ся умом, вьнимая чюдеси, еще бо младенцу вь утробе матерни прогласити, нь слава единому иже сына творящему Богу.
По сих же, егда испльнишася дни рождению, родиста сынь и нарекоста имя ему Варфоломеи. Родителие же честнаго оного отрока вьзвестиша священнику о проглашени святого отрока, сущу вь утробе матерни. Священник же, расуждение имее от Божественаго открьвениа, рече родителема его: «О семь убо радостию радуитеся и веселиемъ веселитеся, понеже чадо ваше сьсудь избран хощеть быти Богу и Троици служитель». Еже и бысть. Родителие же сиа умомь вьнимающе, зело радовахуся, пакы же о младенци чюдо