кь святому, моле его, яко да пакы вьзвратится вь свои ему монастирь, рекь: «Да некако братиа, надлъзе скорбеще, разидутся». Ть же не могы преслушатися архиереа, абие пакь вьзвращается вь болшую обытелъ. Тамо же остави некоего от ученик своих, Романа именемъ, мужа вь добродетели сьвершена, сему вьручаеть паству монастира оного. Моливь первее предреченнаго Исакыа, еже вьсприяти монастирское строение, нь ть никакоже повынуся, по реченному: «Бых яко человекь не слыша, и яко немь не отвръзае устъ своих». И тако подвизашеся великымь въздрьжаниемъ, постомь и бдениемь тело свое изнураа, конечне же послушаниемъ и до последняго житиа своего. И тако в томь тщашеся душу свою Господеви предати, егоже от юности вьжделе.
Слышано же бысть вь монастири святого приход, изыдоша братиа вь сретение его. Его же и видевше, мнеху второе солнце въсиавше.