нося. Почюв же святый, виде, и се, исхожаше изо уст его яко пламень огнен и восхожаше на небо, ангел же идяше вослед его яко столп огнен и держаше копие обнаженно обапол его, и ограждаше ему душу и тело, и обращая же ся за ним ангел, разганяше яко мурины некия, гневаяся и претя им, мышляху бо на праведнаго. Се же видев святый, глаголаше: Воистинну дивен Бог во святых Своих, Бог Израилев, Той бо даст Бог крепость рабом Своим, и Той управляет люди Своя, благословен Господь. И стоящу ему в праздник святого воскресения в суботу вечер, и виде, и се, Пречистая Богородица со святыми апостолы приде посреде народа, беседующи, купно и со инеми святыми, и ходяще, расматряше когождо их, кою правду имать, а намнозе бе видя ю, радующуся зело и веселящу, видяше бо ея тщанием великим спеюща о спасении своем.