и сь супружницею своею, Мариею именемь, поучающеся вь заповедехь Господних день и нощь и едини кь единому душу сь теломь преклонше моляхуся. Родиста же прьвенца себе и нарекоша име ему Стефанъ. Втораго же Варфоломеа, о немже ныня повесть проходимъ. Нь убо что речемь кь ним, от честна корене святаа отрасль. О, прехвалнаа версто! О, добраа супруго! О, блаженое сьчетание и святое порождение! Блажени есте вьистину и преблажени, сподобльшеся таковому отроку родителие быти.
Бысть же убо и таково чюдо прежде рождениа его. Случи же ся, якоже о Иоане Предтечи, познавша Владыку и вь чреве матерни вьзигравшася, такожде и зде случися. Пришедши бо, рече, матери его по обычаю своему вь церковь помолитися. И вь время Трисвятаго глас младенца из матерних чресль слыша