шися и отрока коньчне лишишися». Он же обещася никомуже известити. И приемь отроча здраво, отиде вь домь свои. Мльчати убо неможаше, проповедати же не смеаше, нь тако бе вь себе дивеся, хвалу вьздае Богу, творшему дивнаа и преславнаа: «Яже видеста, - рече, - очи наши». Уведано же бысть чюдо сие от иже тогда служеща ученика святого.
О бьснующимся велможе. Инь же бе велможа вьдале от лаври преподобнаго отца нашего на реце, Вльзе глаголеме. Бе же ть предречении велможь бесомь мучимь люте, непрестанно вь дни и вь нощи, яко и железниа ему узи ськрушати. И ничимже могуще его удержати, яко 10 или множае мужь крепкых: овех бо рукама биаше, иних зубы хапае, и тако от нихь отбегь в пустаа места, тамо пребываше, мучимь люте от беса, дондеже пакы обретаху его и, связавше, ведеху и вь свои ему домъ.