Сия убо глаголы яко слыша царев сын, свет восия в души его. И востав от престола, от радости обьем Варлама, рече: Еда есть, якоже аз мню, честнейши в человецех, камень он безценный, егоже втайне подобна имаши, не всякому, хотящему видети, сего показая, имже здрава суть чювства; се бо, яко глаголы приях слухома моима, свет сладчяйший вниде ми в сердце и тяжкий он печяли покров, иже за многи лета уже лежаше на уме моем, въскоре раздрася; аще убо добре мня возвести ми, аще ли лучше нечто от глаголанных веси, не отрицайся от них явити ми. Паки убо Варлам отвещеваше: Ей, тако есть, господи мой царю, се есть великое таиньство сокровенное от веков и родов, напоследок же летом явльшися роду человеческому, егоже явление древле божественаго Духа благодатию провозвестиша мнози пророцы и праведницы многочестне и многообразне научающе, и велегласно провозвещающе вси хотящее быти спасение прозряше, желаху се видети, и не видях, но последний род сей сподобися спасение прияти,