И глагола к нему Иоасаф: Вси глаголи твои добри и дивни суть, аз бо веровах и верую, всяко убо идолослужение от сердца возненавидех, прежде да иже не прииде ты ко мне, странно некако размышляя о сих пребывающе моя душа, ныне же свершеною ненавистию возненавидех, и видех от тебе суетство их и безумие служащим им, желающе истиннаго Бога раб быти, аще не отринет мене, недостойнаго, за грехи моя, но простит ми вся Человеколюбец сый милосерд, якоже учиши; се убо готов есмь крещение прияти, и вся, елико речеши ми, сохранити, и что подобает творити ми по крещении или довлеет токмо на спасение, еже веровати и креститися, или ино что подобает приложити? И рече к нему Варлам: Послушай, что подобает творити по крещении: всякого убо греха и всякия страсти удалятися, наздати же себе на основание православныя веры и добродетели и деяний, понеже вера без дел мертва есть, якоже бо и дела без веры мертвы суть, глаголет бо апостол: В Дух ходите