Слышав бо некоего царя, бывша зело добре смотряюща своего царства, кроток же и тих суще, и под ним сущем людем, но сим единем согрешающим, еже не имети богоразумия просвещения, но идольскою лестию одержим бяше, и мняше же некоего советника блага и всяким к Богу украшена благочестием, и прочею всякою добродетелию и премудростию, иже скорбяше и негодоваше о прелести цареве, и хотя его о сем обличити, удержаше же ся от дерзновения, бояся, да не зле исходатай себе же и дружине своей будет, и бываемую от него многим пользу пресечет, обаче искаше времени благоугодна, да привлечет его на благочестие. Рече убо к нему во едину нощь царь: Гряди, да изыдеве и походиве по граду, егда что на пользу узреве. Ходящема же има по граду. И видеста же света зарю от некоего оконца сияюще, и к тому оконцу очи приложивша, узреста же под землею места, яко пещеру некую жилище, и в немже седяше муж в последней нищете живущи, и в худыя некия ризами