воистину сущему и присносущему, ни начала имевшу когда преславному Божеству Его, ни конца же имуща, страшному и всемогущему, благому же и благоутробному, да просветит очи сердца твоего и даст ти дух премудрости и откровение разума Его, яко да увеси, что есть надежда звания Его, и что богатство славы наследия Его во святых, и что преимущее величество силы Его в нас верующих, да ктому не будеши чюждий пришелец, но согражданин святым и свой Богови наздан на основании апостол и пророк, сущее краеугольному самому Иисусу Христу, о Немже всяко создание глаголемо возрастает в церковь святую о Господе. Иоасаф же, зело умилився сердцем, рече: Сия же вся и аз желаю уведети, молю ти ся, скажи ми богатьство славы Божия, иже преимуще силы Его.
Рече же Варлам: Богови молися научитися сим и разум таков вложити в душу твою, зане от человек речене быти Того славе и силе отнюд невозможно, аще и вси нынешни и некогда бывших человек языцы во едино будут.