Прослезив же ся абие Иоасаф, рече к нему: Аще бо Господеви сие годе есть, воля Его да будет, свершив мя прочее убо божественным крещением, и взем от мене злато и ризы на пищу и на одеяние тебе же и другом твоим, отъиди на место пощения своего, Божиим миром храним, и за мя непрестанно молися, да не отпаду надежда моея, но въскоре дойти возмогу тебе, и в молчянии глубоце пребывати от тебе прием пользу. Варлаам же рече: Еже Христову прияти печать возбранение никакоже есть. Уготовися прочее сам, и Господу поспешествующу, совершен будеши, и о нихже рекл еси, злато другом моим дати како будет се, тебе убогу богатым милостыня дати, богатии бо всегда нищим благодеяние творят, а не убози богатым, ибо последнии от всех другов своих богатейши есть от тебе разсуждения, но надеюся на щедроты Божия, и тебе елико бо помале преобогатети, и тогда неподатлив будеши. Рече Иоасаф к нему: Скажи ми слово се, како, иже всех другов твоих