В той же день, егда крестити его хотяше, учя его, глаголаше: Се обещася Христову прияти печять и светом знаменатися лица Господня, и сын бываеши Божий, храм же Святому и Животворящему Духу, веруй убо ныне во Отца, и Сына, и Святого Духа, во Святую и Живоначяльную Троицу, в триех составех и во едином Божестве прославляемей, разделеней убо составы и составными свойствы, соединене же существом, единого ведый Бога, нерождена Отца, единого же рождена Господа Иисуса, света от света, Бога истинна от Бога истинна, рожденна прежде всех век, благаго Отца благ родися Сын, от света нерождена свет восия присносущен, и от истинаго живота животворящий произыде источник, и от самоя силы сыновня сила явися, еже есть сияние славы и слово составно, изначяла сый к Богу и Бог сый, безначялен же и присносущен, Имже вся быша, видимая же и невидимая, Духа Святого от Отца исходяща, Бога совершена и животворяща, и священие приимая самовольна, самосильна, сприсносущна, составна;