И не презре же его плачющася благий Владыка, благ бо есть терпящим Его ради во время скорби и зная боящихся Его. Иже юноши в видении нощнем вся сказа, и крепость в него вложи, и дерзати на благочестный подвиг сотвори, убудившу же ся ему от сна, радости исполнен и деръзновения и пресладкаго света, малом прежде того скорбяще и болящее обрете свое сердце. Царь же тако сия сотворив и сице промыслив, радовашеся, яко добре расмотрив, мняшеся и Варахии велику воздая благодать, но солгане правда себе по божественному Давиду: И правда побеждает беззаконие, доконца сие низложиши и память его погубиши студом, якоже слово по сих скажет.

По двою бо дни царь прииде во сыновню полату, и тому на сретение изшедшу, не целова его по обычаю отец, но враждебно, якоже гневающемуся уподоблься, вшед в царскую ложницу, со унынием седе, таче сына призвав, рече: Кая хула вшедши во уши мои, чядо.