Иногда паки седящу блаженому во храмине своей, и прииде некто, и глагола ему: Да прошу святыню твою, исповеждь ми, нехуде бо ми скорбит душа моя от помысла того, не веде откуду ми нападающа. И рече ему преподобный: И сотона льсти, яко елико еси дети изъял от святого крещения, несть ти мзды от Бога, глаголет бо Господь (в) Писания том, яко вас приемлет, Мене приемле и Пославшаго Мя. И паки взем Иисус отроча младо, и постави его пред Собою, и рече: Аминь, аминь глаголю вам, иже приемлет малых сих, Мене приемлет, да что есть, чада, блаженее того, понеже младенца приемлеши, приемлеши Христа, Духом же прие Отца Его; да что есть, чадо, унее того или светлее, или, чадо, твори добро, елико бо младенец приемлеши от святого крещения, то ти преди пойду пред душею твоею до врат небесных, и честь велику творяще, и мног труд творяще воздушным бесом в день он, егда оставиши житие свое и преидеши ко Владыце в радости