Житие и жизнь преподобнаго отца нашего богоноснаго Сергеа, въ немже имать и от божестъвеныхъ чюдесъ его. Съписано священноиноком Пахомиемъ Святиа горы. Благослови, отче.
Приидете, честное и святое посникь сьловие, приидете, отци и братиа, приидете, празднолюбци, приидете, овчета духовнаа, прииди, стадо христоименитое, всяка бремена мирскых вещеи отврьгше, и чисти непорочному да явимся. Се бо сьвыше наше звание прииде. Се духовнаа трапеза предлежитъ. Се хлеби неистьщаемиа пища и масло милованиа. Се целомудренаа пшеница и вино, душу и тело веселеще. Се труба, человекы обнавляюще и бесомь неисцелну язву дающа, божественый огнь, иже терние греховное попаляюще. Се убо Рускыа земли, паче же вьселенниа, похвала. Темже приидете, яко да насладимся добраго